MKUU WA JUMUIYA YA KIISLAMU AFRIKA YA KATI ATAKA MAPIGANO DHIDI YA WAISLAMU YAKOMESHWE HASA MWEZI MTUKUFU WA RAMADHANI

 

Mkuu wa Jumuiya ya Waislamu wa Jamhuri ya Afrika ya Kati amesema kuwa kusameheana na kukomeshwa mapigano, ndiyo njia pekee ya kuikwamua nchi hiyo katika hali ya machafuko inayoendelea nchini humo.

Akizungumza na vyombo vya habari, Sheikh Oumar Kobine Layama amezitaka pande zinazopigana nchini humo kukomesha mapigano hasa katika mwezi huu mtukufu wa Ramadhani. 

Sheikh Oumar Kobine amesisitiza kwamba kusameheana na kukomeshwa mapigano ndiyo njia pekee itakayoweza kuinusuru nchi hiyo na machafuko yanayoendelea. 

Mkuu wa Jumuiya ya Waislamu ya Jamhuri ya Afrika ya Kati amesema kuwa, mwezi mtukufu wa Ramadhani ni mwezi wa amani, kusameheana, udugu, umoja, mshikamano na wa kutakiana kheri baina ya waumini wa dini tofauti. 

Matamshi ya Sheikh Oumar Kobine Layama yanatolewa katika hali ambayo kuna wasiwasi wa kujitokeza mashambulio

ya wanamgambo wa Kikristo wa Anti Balaka dhidi ya Waislamu katika mwezi huu mtukufu wa Ramadhani.

Ikumbukwe kuwa Jumapili iliyopita, Waislamu wa Jamhuri ya Afrika ya Kati waliungana na wenzao duniani, kufunga saumu ya mwezi mtukufu wa Ramadhani.