HALIMA MDEE RUMANDEEEEEEE

DAR ES SALAAM

MBUNGE wa Kawe, Halima Mdee (35) na wanachama wenzake wanane wa Chama cha Demokrasia na Maendeleo (Chadema) wamepelekwa rumande baada ya kushindwa kukamilisha taratibu za dhamana katika kesi inayowakabili ya kutotii amri halali ya Polisi na kufanya mkusanyiko bila kibali.

Mdee ambaye ni Mwenyekiti wa Baraza la Wanawake Chadema (Bawacha) pamoja na wanachama hao, wamepandishwa kizimbani katika Mahakama ya Hakimu Mkazi Kisutu, jijini Dar es Salaam.

Wengine ambao wameosomewa mashitaka mbele ya Hakimu Mkazi, Janeth Kaluyenda ni Rose Moshi Mkazi wa Kinondoni B, Renina Peter maarufu kama Lufyagila mkazi wa Kinondoni Mkwajuni, Anna Linjewile mkazi wa Mbezi Luis na Mwanne Kassim mkazi wa Pugu Kajiungeni.

Mawakili wa Serikali, Bernard Kongola, Salum Mohamed na Hellen Mushi wakisaidiana kusoma mashitaka, wamedai Oktoba 4, mwaka huu, katika mtaa wa Ufipa, bila kuwa na uhalali washitakiwa hao walikiuka amri halali ya kutawanyika iliyotolewa na Mrakibu wa Polisi (SP) Emmanuel Tillf kwa niaba ya Jeshi la Polisi.

Katika mashitaka mengine inadaiwa siku hiyo katika eneo hilo, kwa pamoja, walifanya mkusanyiko usio halali kwa lengo la kutembea kwenda Ofisi ya Rais.

Hata hivyo, washitakiwa wamekana mashitaka hayo na kesi hiyo imeahirishwa hadi Oktoba 21 mwaka huu itakapotajwa kwa ajili ya usikilizwaji wa awali.