KIKWETE...MABALOZI WACHENI KUCHANGANYA DINI NA SIASA

DAR ES SALAAM

Raisi Jakaya Kikwete amesema upo ushahidi unaothibitisha kuwa baadhi ya mabalozi wanaowakilisha nchi zao nchini wamekuwa wakichanganya dini na siasa kuunga mkono shughuli za kisiasa za baadhi ya vyama.

Kufuatia hatua hiyo ambayo Rais ameiita kuwa ni njia ya hatari, ameomba mabalozi waiokoe nchi katika majanga makubwa yanayoweza kutokea kutokana na kutumia dini kuendeleza siasa.

Rais ameyasema hayo wakati akizungumza wakati wa chakula cha usiku na viongozi wa dini nchini wanaoendelea na mkutano wao wa mwaka jijini Dar es Salaam.

Katika mkutano huo, mabalozi 15 wanaoziwakilisha nchi zao nchini wanahudhuria yakiwamo na mashirika kadhaa ya kimataifa ikiwa ni pamoja na la Mpango wa Maendeleo wa Umoja wa Mataifa (UNDP).

Mabalozi wanaowakilisha nchi zao katika Mkutano huo ni wa Ujerumani, Iran, Marekani, Norway, Uturuki, Sweden, Canada, Denmark, Finland, Misri, Qatar, Uswisi, Palestina, Umoja wa Falme za Kiarabu (UAE), Saudi Arabia na Umoja wa Ulaya (EU).