ZAIDI YA 100 WAFARIKI DUNIA KUFUATIA MAFURIKO NCHINI AFAGHANISTAN, NA WENGINE WENGI WABAKI BILA MAKAZI

Watu zaidi ya 100 wamefariki dunia na mamia ya wengine wamebaki bila ya makaazi kutokana na mafuriko yaliyoukumba mkoa wa Baghlan nchini Afghanistan. 

Kwa mujibu wa maafisa wa serikali, mafuriko hayo yameyotokea usiku wa kuamkia jana huku yakisomba na kuharibu mamia ya nyumba. 

Ripoti zinaeleza kuwa waathirika wa janga hilo ni wakaazi wa wilaya ya Gozar Gahe, huku ikihofiwa kuwepo uwezekano wa kuongezeka idadi ya vifo, kutokana na baadhi ya ripoti zinaeleza kuwa idadi ya watu waliofariki ni 200. 

Mnamo mwezi Aprili zaidi ya watu 150 walifariki na maelfu ya wengine kubaki bila ya makaazi baada ya mafuriko kuikumba mikoa ya Faryab, Sar-e-Pol, Jowzan na Badghis nchini Afghanistan. 

Majanga kama hayo ya kimaumbile husababisha maafa makubwa ya roho za watu na mali kutokana na nyumba nyingi nchini humo kujengwa kwa kutumia udongo wa tope na mawe hali inayosababisha kusombwa kirahisi na maji.