WAKIMBIZI 1,541 WAPATIWA URAIA WA TANZANIA

Serikali ya Tanzania imetoa uraia kwa wakimbizi 1,541 wa kisomali waliokuwa wanaishi katika makazi ya Chogo, Wilaya ya Handeni mkoani Tanga.

Watu hao waliikimbia Somalia mwaka 1990 baada ya kuibuka kwa vita nchini mwao ambapo 3,000 kati ya waliokimbilia Tanzania walipokelewa na kuhifadhiwa katika kambi ya Mkuyu iliyopo mkoani Tanga.

Watu hao kwa kipindi chote hicho walikuwa wakipata msaada kutoka Shirika la kuhudumia wakimbizi la Umoja wa Mataifa (UNHCR).

Waziri wa Mambo ya Ndani ya Nchi, Mathias Chikwawe amesema wakimbizi hao ambao kwa sasa ni raia wa Tanzania, walihamishwa na Serikali mwaka 2003 kutoka kambi ya Mkuyu na kuja katika makazi ya Chogo ili wapatiwe mashamba kwa ajili ya kujishughulisha na kilimo ili waweze kujitegemea.

Hata hivyo, Waziri Chikawe amewataka wakimbizi 150 walioko katika makazi ya Chogo ambao hawakuomba kuwa raia wa Tanzania kwa nia ya kurudi nchini kwao pale amani itakapo patikana wanapaswa kuendelea kutii sheria za nchi zinazotawala hifadhi ya ukimbizi nchini.