MKUU WA CHAMA CHA JAMAAT-E-ISLAMI, SHEIKH MOTIUR RAHMAN AHUKUMIWA ADHABU YA KIFO NCHINI BANGLADESH.

 

Serikali ya Bangladesh imeendelea kuyakandamiza makundi yenye mielekeo ya Kiislamu nchini humo kwa kutoa hukumu ya kifo dhidi ya kiongozi wa chama kikubwa zaidi cha Kiislamu nchini humo. 

Mahakama ya kufuatilia jinai za kivita ya Bangladesh imemuhukumu kifo Motiur Rahman Nizami, mkuu wa chama cha Jamaat-e-Islami mwenye umri wa miaka 71 kwa tuhuma za kufanya magendo ya silaha, kuhusika katika mauaji ya umati, jinai na machafuko nchini humo. 

Baada ya kutolewa hukumu hiyo, jeshi la polisi la nchi hiyo limeimarisha ulinzi katika maeneo yote muhimu ya Dhaka, mji mkuu wa Bangladesh. 

Kwa mujibu wa kanali ya 24 ya televisheni ya Bangladesh, ulinzi umeimarishwa pia katika miji mingine tofauti ya nchi hiyo. 

Wafuasi wa Motiur Rahman wanaamini kuwa, kiongozi wao huyo hana hatia na kwamba serikali ya Bi Sheikh Hasina Wajed, Waziri Mkuu wa Bangladesh inatumia vibaya idara ya mahakama kuwakandamiza wapinzani hususan viongozi wa makundi ya Kiislamu kwa kuwatuhumu kufanya jinai za kivita. 

Kabla ya kutolewa hukumu hiyo dhidi ya mkuu wa chama cha Jamaat-e-Islami, mahakama ya Bangladesh ilikuwa imewahukumu kifo pia watu wengine wanane akiwemo Mufti Abdul Hannan, mkuu wa chama kilichopigwa marufuku cha Harkatul Jihadil Islami. 

Bi Sheikh Hasina Wajed na chama chake cha Awami League ameendelea kung'ang'ania madaraka ya nchi hiyo baada ya kuitisha uchaguzi uliojaa utata ambao ulisusiwa na vyama vya upinzani na hivi sasa anafanya kila njia kuhakikisha anawamaliza wapinzani wake wa kisiasa na kidini. 

Hii ni kwa sababu sambamba na kutolewa hukumu ya kifo kwa wanaharakati wa Kiislamu, ndugu wa kiume wa mmoja wa mawaziri wa zamani wa nchi hiyo katika serikali ya Khaleda Zia, Waziri Mkuu wa zamani wa Bangladesh naye alihukumiwa adhabu ya kifo jambo ambalo linaonesha wazi kuwa idara ya mahakama nchini Bangladesh imeazimia kuwanyamazisha kwa kila njia wapizani. 

Katika hatua ya mwanzo kabisa ya kuyakandamiza makundi na vyama vya Kiislamu nchini Bangdalesh, Waziri Mkuu wa nchi hiyo Bi Sheikh Hasina Wajed aliamua kukipiga marufuku chama pekee cha Kiislamu nchini humo cha Jamaat-e-Islami na hivyo kuwazuia wanachama wa chama hicho kushiriki katika uchaguzi wa Bunge wa mwezi Januari mwaka huu. 

Moazzam Husain, Jaji wa Mahakama Kuu ya Bangladesh alitangaza kuwa chama cha Kiislamu cha Jamaat-e-Islami kinaendesha shughuli zake kinyume cha sheria katika mfumo unaopinga dini wa 'kisekula' unaotawala nchini Bangladesh. 

Baada ya hapo serikali ya nchi hiyo ikaanza kuwaandama viongozi wa chama hicho na kuwahukumu adhabu za kifo licha ya kukumbwa na malalamiko makali ndani na nje ya nchi hiyo. 

Ali Ahsan Muhammad Mojahed, kiongozi mwingine mwandamizi wa chama hicho cha Kiislamu naye amehukumiwa kifo huku kiongozi wa kidini na kimaanawi wa chama hicho, Sheikh Ghulam Azam naye akihukumiwa kifungo cha miaka 90 jela. 

Baada ya kutolewa hukumu hizo, maelfu ya wananchi wa Bangladesh walimiminika mabarabarani, na tayari zaidi ya watu 100 wameshauawa katika machafuko yaliyozuka baada ya kutolewa hukumu hizo. 

Mashirika ya haki za binadamu nayo yamelaani hukumu hizo na kusema zinakanyaga sheria za kimataifa. 

Makundi ya Kiislamu nchini Bangladesh yanaamini kuwa serikali ya nchi hiyo inashirikiana na Marekani kujaribu kuyadhoofisha makundi hayo ya Kiislamu na kutia nguvu fikra za kisekula na kilaiki za kupinga dini nchini humo sambamba na kuchochea ufuska miongoni mwa wananchi. 

Makundi hayo yanasema, ni kwa sababu hiyo ndio maana serikali Bi Sheikh Hasina Wajed ikatumia Mahakama Kuu ya nchi hiyo kuvipiga marufuku vyama vya Kiislamu na kutoa hukumu za kifo kwa viongozi wa vyama hivyo.