ZANZIBAR Waislamu nchini wametakiwa kujikurubisha kwa Allah (SW) hasa katika ibada mbalimbali hasa Ibada ya funga katika mwezi huu mtukufu wa Shaabani. Wito huo umetolewa na Imam Mkuu wa Masjidi Rahman, Samaahatu Sheikh Mohammed Aliy Hamad wakati akizungumza na waumini wa msikiti huo katika kijiji cha Mtakuja wilaya ya Micheweni kisiwani Pemba. Sheikh Mohammed amesema, shaabani ni mwezi mbao Bwana Mtume (SAW) alikuwa akijikurubisha mno kwa Mola wake hasahasa katika ibada ya tukufu ya Swaumu. Amesema, huu ni mwezi ambao kama alivyosema mtukufu wa darja Mtume Muhammad (SAW) kuwa matendo ya mja hupandishwa kwa mwenyezi Mungu (SW) hivyo ni vyema matendo hayo yapandishe ikiwa muislamu akiwa katika ibada tukufu ya funga. Aidha amesema kuwa, inapaswa ifahamike kuwa uislamu ni kujisalimisha kwa Allah (SW) katika kila hatua ya maisha ya mwanadamu huku zikifuatwa nyayo na mwenendo wa Mtume Muhammad(SAW) ambaye ndie kiigezo cha waislamu wote. Mwezi wa Shaaban ni mwezi wa nane katika kalenda ya kiislamu ambapo mtume (SAW) alikua akikithirisha sana kufunga kuliko miezi mingine yote ispokuwa mwezi mtukufu wa Ramadhani ambao utaingia kwa kumalizika kwa mwezi huu wa shaaban.

ZANZIBAR.

Majaji mjini Zanzibar wameendelea kuilalamikia serikali kutokana na kuondolewa kwa ulinzi wa jeshi la polisi nyumbani kwao jambo wanalodai linahatarisha uhai wa maisha yao.

Akizungumza na waandishi wa habari, Jaji Mkuu wa Zanzibar, Omar Othman Makungu amethibitisha kuwapo kwa hali na kusema kuwa  mamlaka husika imeanza kufuatilia.

Aidha, Jaji Makungu amesema awali waliwahi kujadili juu ya suala hilo na kufikia hatua nzuri ambapo, vikosi maalumu vya SMZ ndiyo vingepaswa kufanya  kazi hiyo.

Naye, Kamishna wa Polisi Zanzibar, Hamdani Omar Makame amesema ni kweli kwamba  askari wa Kikosi cha Kuzuia Ghasia(FFU) ambao walikuwa wakihusika na shughuli hizo wameshaondolewa kwenye shughuli za ulinzi

Hata hivyo, amesema tayari wameshapeleka mapendekezo yao kutaka kila nyumba ya jaji kujengwa kibanda maalumu kwa ajili ya walinzi, lakini jambo hilo halijafanyiwa kazi hadi sasa.