TWAHARA

TWAHARA

NINI MAANA YA TWAHARA?

KILUGHA.

Ni usafi na kumalizana na uchafu au takataka za kihisia kama vile najisi kutokana na mkojo au kinginecho, na uchafu wa kidhahania kamakasoro (mapungufu) na maasi.

KISHERIA.

Ni kuondosha kile chenye kuzuia swala kutokana na hadathi au najisi kwa kutumia maji (au kinginecho) au kuondosha hukumu yake kwa mchanga.

HUKMU YA TWAHARA

Twahara ni jambo la wajibu ikiwa mtu atakumbuka na ataweza. Dalili ni kauli yake Allaah (Subhaanahu wa Ta'ala). Allah  anasema:

((وَثِيَابَكَ فَطَهِّرْ))

«Na nguo zako zitwaharishe»

 Aidha anasema (Subhaanahu wa Ta'ala):

((أَن طَهِّرَا بَيْتِيَ لِلطَّائِفِينَ وَالْعَاكِفِينَ وَالرُّكَّعِ السُّجُودِ))

«Ya kwamba itakaseni Nyumba Yangu kwa ajili ya wanaoizunguka kwa kutufu na wanaojitenga humo kwa ibada, na wanaoinama na kusujudu»

Ama kujitwaharisha na hadathi, hilo ni lazima ili kuruhusika kuswali, kwa kauli yake Mtume (Swalla Allahu 'alayhi wa aalihi wa sallam)

(( لا تقبل صلاة بغير طهور))

 ((Swalah haikubaliwi bila ya wudhuu))

UMUHIMU WA TWAHARA:

1. Ni sharti ya kusihi kwa swala ya mja. Mtume (Swalla Allahu 'alayhi wa aalihi wa sallam) amesema:

((لا تقبل صلاة من أحدث حتى يتوضأ))

((Haikubaliwi sala ya mtu mwenye hadathi mpaka atawadhe))[4]

2.  Ni kujipamba na sifa ya kuwa kipenzi cha Allah (Subhaanahu wa Ta'ala). Allaah (Subhaanahu wa Ta'ala) Amesema:

 ُ ((إِنَّ اللّهَ يُحِبُّ التَّوَّابِينَ وَيُحِبُّ الْمُتَطَهِّرِينَ))

«Hakika Allaah Anawapenda wenye kutubia na Anawapenda wenye kujitwaharisha»

Aidha, Allah (Subhaanahu wa Ta'ala) anasema:

((فِيهِ رِجَالٌ يُحِبُّونَ أَن يَتَطَهَّرُواْ وَاللّهُ يُحِبُّ الْمُطَّهِّرِينَ))

«Ndani yake kuna watu wanaopenda kujitwaharisha, na Allaah Anawapenda wenye kujitwaharisha»

3. Ni kinga kutokana na adhabu za kaburi. Imepokelewa na Ibn ‘Abbaas akisema: Mtume (Swalla Allahu 'alayhi wa aalihi wa sallam) alipita kwenye makaburi mawili akasema:

((إنهما يعذبان  وما يعذبان في كبير أما  هذا  فكان لا  يستنزه من بوله))  

((Hakika wao (maiti) wanaadhibiwa, na hawaadhibiwi kwa jambo kubwa. Ama huyu, alikuwa hajitakasi na mkojo wake….))   

AINA ZA TWAHARA

 Maulamaa wanaigawanya Twahara ya kisheria katika vigawanyo viwili:

1.     TWAHARA YA KIHAKIKA: Nayo ni Twahara ya kuondosha najisi. Hii inakuwa katika mwili, nguo na mahala.

2.     TWAHARA YA KIHUKUMU: Ni Twahara kutokana na hadathi, nayo inahusiana na mwili. Aidha Maulamaa wameigawanya aina hii ya twahara katika hali kuu tatu (3)

(a)  TWAHARA KUBWA, nayo ni kuoga 

(b) TWAHARA NDOGO, nayo ni kutawadha

(c)  TWAHARA YA KATI NA KATI.  Nayo ni badala ya viwili hivyo vinaposhindikana, ambayo ni kutayamamu.