ULINZI WAIMARISHWA KUAPISHWA KWA EL SISI

Abdul-Fattah el Sisi ameapishwa kuwa rais wa Misri hapo jana katika Mahakama ya Katiba mjini Cairo huku kukiwa na ulinzi mkali. 

Adli Mansour aliyekuwa rais wa muda Misri alimkabidhi rasmi el Sisi hatamu za uongozi katika sherehe hiyo. 

Vyombo vya habari vya Misri vimeripoti kuwa, viongozi wasiopungua 45 wa Kiarabu na kimataifa walikuwepo kwenye sherehe hizo. 

Katika hotuba yake el Sisi amesema atajitahidi kuimarisha uchumi na misingi ya kijamii na kiusalama nchini humo. Aidha amewashukuru wawakilishi wa nchi za kigeni walioshiriki katika sherehe za kuapishwa kwake na kuongeza kuwa sambamba na ujenzi mpya wa Misri atahuisha nafasi na ushawishi wa Cairo kieneo na kimataifa. 

El Sisi ameongeza kuwa Misri mpya itashiriki katika kurejesha amani na uthabiti wa kieneo. 

Rais mpya wa Misri ameendelea kusema kuwa taifa la Misri lichukue hatua za kuhakikisha lina mustakabali mwema wenye matumaini.

Wakati huo huo duru katika serikali ya Misri zinadokeza kuwa Ibrahim Mahlab ambaye hivi sasa ni waziri mkuu wa nchi hiyo ataendelea kushikilia nafasi yake hadi pale uchaguzi wa bunge utakapofanyika. 

Uchaguzi wa  bunge Misri unatazamiwa kufanyika bada ya kuidhinishwa katiba mpya ya Misri. 

Abdul Fattah El Sisi ameapishwa kuwa rais wa Misri huku wafuasi wake wakiwa na matumaini mengi, huku kukiwa na wale wasemao  kuwa yamkini akawa na nafasi nzuri katika mustakabali wa Misri huku wengine wakiamini kuwa jenerali huyo wa zamani jeshini atatumia mkono wa chuma dhidi ya wananchi hasa wapinzani.

El Sisi amewaahidi wananchi kuwa ataboresha maisha yao katika kipindi cha miaka miwili ijayo.  

Aidha amesema atahakikisha kuwa wananchi wanafikia malengo yao ya mapinduzi.  

Haya ni mapinduzi ambayo miaka miwili iliyopita yalianza katika Medani ya Tahrir mjini Cairo kwa shaari za uhuru, uadilifu wa kijamii na heshima ya mwanaadamu. 

Hivi sasa Wamisri wanatarajia kuwa el Sisi atatekeleza shaari hizo la sivyo serikali yake itakabiliwa na hali mbaya siku za usoni. 

Inavyoelekea ni kuwa watu wa Misri hivi sasa wako katika hali ya hofu na matumaini, wakisubiri kuona  iwapo El Sisi kama alivyoahidi ataipelekea Misri katika mkondo wa demokrasia au kama wanavyosema wapinzani wake ataunda utawala wa kiimla wenye kutawala kwa mkono wa chuma na kuwakandamiza wapinzani.