ULINZI WAIMARISHWA NCHINI KENYA KUFUATIA HALI YA TAHARUKI

Hali ya taharuki imezidi kutanda mjini Mombasa nchini Kenya kufuatia kupigwa risasi na kuuawa Sheikh Muhammad Idriss aliyekuwa Mwenyekiti wa Baraza la Maimamu na Wahubiri wa Kiislamu CIPK.

Kamishna wa polisi mjini Mombasa Nelson Marwa amesema kuwa, polisi wamejipanga na wamewekwa katika maeneo mbali mbali ili kuhakikisha usalama kwa raia unalindwa.

Sheikh Idriss aliuawa kwa kupigwa risasi nje ya nyumba yake saa kumi na moja alfajiri ya kuamkia Jumanne wakati alipokuwa anaelekea katika Msikiti wa Swalihina ulioko takribani mita 50 tu kutoka nyumbani kwake. 

Kwa muda mrefu Sheikh Idriss alikuwa mwenyekiti na Imamu wa Msikiti wa Sakina mjini Mombasa kabla ya kuondolewa kwa lazima na vijana wanaodaiwa kuwa wenye itikadi kali kwa kile kinachodaiwa kuwa sheikh huyo alikuwa mnafiki.