UNYAMA WA ANTI BALAKA

 

Waziri wa Sheria wa Jamhuri ya Afrika ya Kati amesisitiza juu ya ulazima wa kufunguliwa mashtaka wale wote waliohusika kwenye mauaji ya waislamu wasio na hatia na kutenda jinai mbalimbali nchini humo.  

Isabelle Gaudeuille amesema kuwa, mwishoni mwa mwezi uliopita, serikali ya Bangui iliiomba Mahakama ya Kimataifa ya Jinai (ICC) ifanye uchunguzi kuhusiana na jinai zilizofanywa na kundi la kigaidi la kikiristo la Anti balaka nchini humo. 

Waziri wa Sheria wa Jamhuri ya Afrika ya Kati amesisitiza kwamba kuna udharura mkubwa kwa mahakama hiyo ya kimataifa kuanza kuchunguza haraka jinai zilizofanyika nchini humo na kufunguliwa mashtaka watuhumiwa wote wa jinai hizo.

Wakati huohuo, makundi mbalimbali nchini Jamhuri ya Afrika ya Kati yameanza mazungumzo yenye lengo la kurejesha amani na utulivu nchini humo. 

Taarifa zinasema kuwa, wawakilishi kutoka makundi ya kiraia, harakati za kisiasa, viongozi wa kidini, wachumi na wawakilishi wa jeshi wameanza kikao cha faragha cha siku tatu kinachojadili hali ya kiusalama nchini humo.

Hayo yanakuja huku ikiwa maelfu ya waislamu tayari wamekwisha kuyahama maeneo yao na kugeuka wakimbizi na wengine wengi kuuwawa kinyama na kikatili huku majumba yao yakibomolewa mali zao kuteketezwa na miskiti kuvunjwa vunjwa na mingine kugeuzwa majumba ya starehe.