JAJI MKUU KENYA, WILLIE MUTUNGA AWATAKA MAJAJI KUWA WABUNIFU KATIKA KUSIKILIZA KESI ZA UGAIDI NCHINI HUMO

 

Jaji Mkuu wa Kenya, Willie Mutunga, amewataka majaji wanaosikiza kesi zinazohusiana na ugaidi kuwa wabunifu katika maamuzi yao ili kulinda maslahi ya taifa.

Mutunga amesema imekuwa vigumu kushinda vita dhidi ya ugaidi kutokana na baadhi ya majaji kupuuza kilio cha walio wengi na usalama wa taifa na badala yake wamekuwa wakijifunga zaidi kwenye tafsiri za kisheria.

Jaji Mkuu wa Kenya amesema majaji wanapaswa kuweka kwenye mizani haki na maslahi ya taifa ili kufikia maamuzi yenye busara.

Amekumbusha kuwa, mahakama kama moja ya mihimili mitatu ya dola inawajibu wa kulinda maslahi ya taifa sambamba na kutoa haki kwa washukiwa.

Mahakama za Kenya zimekuwa zikilaumiwa kwa kuwaachilia huru kwa dhamana baadhi ya washukiwa wa ugaidi jambo linalozidi kuwapa nguvu magaidi na wahalifu wengine.