JEE TUMETUBIA TOBA YA KWELI?

RAMADHANI NI MWEZI WA TOBA, JEE TUMETUBIA TOBA YA KWELI? 

WASWAHILI HUSEMA “KUTANGULIA SI KUFIKA”

             Sifa njema zinamstahiki Allah (SW) ambaye amenichagua mimi na wewe msomaji wa makala hii kuzaliwa ilhali tukiwa na shahada kamili ya kukubalika kuwa waislamu, na rehma na amani zimshukie mtukufu wa darja Mtume (SAW) ambaye ameletwa kuwa mkombozi wa haki, usawa na uadilifu.

               Awali ya yote, tumshukuru Allah (SW) kutujaalia kuweza kuudiriki mwezi mtukufu wa ramadhani hadi kufikia kuukamilisha kwake. Tumuombe Allah (SW) atutaqabalie swaumu zetu, visimamo vyetu,  na ibada zetu kwa ujumla.

Allah (SW) ametuletea mwezi mtukufu wa ramadhani, ambao umesifika kwa sifa kumtu, kama vile; ramadhani kuwa ni mwezi wa rehma, mwezi wa maghfra (toba) au msamaha, na nimwezi ambao waja wa Allah (SW) huachwa huru na moto.

Ni jambo la kawaida kwa mswahili kusikika akisema “kutangulia si kufika” vivyo hivyo, nachelea kusema kuwa tumefika safari yetu lakini huenda ikawa tumekwama sehemu fulani au tumetangulia bila kufika safari yetu.

 Tunapozungumzia “toba” tunamaanisha kukusudia  kurejea kwa Mola mlezi kwa kujiepusha na  madhambi au maasi ya aina zote huku mja akijutia  kwa yale aliyoyafanya na kuazimia kutokurudia tena katika madhambi au maasi hayo na akitaraji msamaha wa Allah (SW).

Kimsingi hii ndio maana ya tauba(toba), ambayo ingembidi kila muislamu aipupie na kudumu nayo katika maisha yake ya kila siku akitambua kuwa, suala la tauba (mja kurejea kwa mola wake) ni suala la lazima.

Kurejea kwa Allah (SW) ni jambo la lazima na lililogogotezwa katika kitabu kitukufu cha Quran na Sunna ya Mtume Muhammad (SAW), kama Quran inavyothibitisha katika (sura ya 66:8), pale Mola mlezi anaposema:

“ Enyi mlio amini! tubuni kwa Mwenyezi Mungu toba iliyo ya kweli! asaa Mola wenu Mlezi akakufutieni maovu yenu na akakuingizeni katika pepo zipitazo mito kati yake, siku ambayo Mwenyezi Mungu hatamdhalilisha Nabii na walio amini pamoja naye. Nuru yao inakwenda mbele yao na pande zao za kulia, na huku wanasema: Mola wetu Mlezi! tutimilizie nuru yetu, na utughufirie! hakika Wewe ni mwenye uweza juu ya kila kitu. (Surat Attah'riim, 66:8)

Pia Allah mlezi amesema:

“…Na tubuni nyote kwa Mwenyezi Mungu, enyi waumini, ili mpate kufanikiwa. (Suratun nur, 24:31)

            Aidha, imegogotezwa na Mtukufu wa darja, Bwana Mtume (SAW), pale aliposema:

“Mwenye kutubia ni kipenzi cha Allah (S W)”             

Tukiangalia maana ya toba kama ilivyofafanuliwa hapo juu, huenda tukarejea katika msemo uleule wa waswahili usemao, kutangulia si kufika.

Hii ni kutokana na kuwa msingi wa kimaana wa tauba umebeba mihimili imara inayoshikilia maana hiyo, jambo linalojidhihirisha kuwa masharti ya kukubalika kwa tauba hiyo.

Masharti hayo ni pamoja na kujuta kwa sababu ya kufanya dhambi, Kuacha kwa haraka dhambi yenyewe, kuazimia kutokurejea tena dhambi hiyo baada ya kutubia na ikiwa dhambi ni katika haki ya mja, inabidi kwanza irudishwe haki hio kwa mwenyewe au umuombe msamaha kwanza ndio utakubaliwa toba yako na Allah (S.W)

Hapa ndipo ninapata wasiwasi juu ya safari yetu hii ya kukamilika kwa mwezi mtukufu wa ramadhani ambayo tayari tumetia nanga. Sijui kama kweli tumefikia kwenye toba hii ya kweli aliyoilingania Allah Mlezi.

  

Katika hili, nimeona kuwa tumeweza kugawanyika katika makundi takriban matatu. Kundi la kwanza ni kundi la waja waliotubia tauba ya kweli, ambalo kiukweli kundi hili ni wachache katika wengi tulioingia katika ibada hii tukufu ya Allah (SW).

Pia, wapo waliotubia ndani ya mwezi wa ramadhani, lakini wakarejea katika maaswi baada tu ya kuindama mwezi huu wa Shawwal, kisha wakajuta na kuzilaumu nafsi zao na kutamani kutokurejea tena katika maaswi hayo.

Aidha, wapo wale waliomlilia Allah (SW) ndani ya mwezi mtukufu wa ramadhani ukweli wa kumlilia, lakini wamezibatwilisha toba zao ndani ya usiku mmoja tu wa Eidilfitri, na kurejea katika maaswi yao kama walivyokuwa kabla ya mwezi wa ramadhani. Hawa wamekula hasara duniani na akhera, wala haikuwa na tija biashara yao hiyo.

      Ndugu yangu msomaji wa makala hii, kiuhakika kila mmoja ni mjuzi juu ya nafsi yake, hebu nisaidie jibu la swali hili, Jee tumefika safari yetu au kutangulia si kufika? Jibu unalokichwani mwako.

Ninamuomba Mola Mlezi atutaqabalie tauba zetu, azithibitishe imani zetu, na atujaalie katika wale waliotubia tauba ya kweli. Ya Allah ! badilisha maovu yetu kuwa mema, zifanye nafsi zetu kuwa ni nafsu l mutwmainna zitakazonadiwa siku ya hukumu na mola zikiambiwa rejeeni kwa Mola mlezi hali ya kuwa mumeridhika na kuridhiwa.

Makala hii imetayarishwa na Muhitimu wa Chuo Kikuu cha Dar es Salaam, Kitivo cha lugha za kigeni na sayansi ya lugha.

Mubaraka   Ghulaam.

                                                                                    Sim no. 0777663795 au0717169464

SIKILIZA RADIO KHERI 104.1FM

“ NI FARAJA KWA UMMA FARAJA KWA WAISLAMU!”