SUMATRA IWAJIBISHWE

Chama cha Kutetea Abiria Tanzania (Chakua), kimemuomba Waziri wa Uchukuzi, Dk. Harrison Mwakyembe, kuwawajibisha watendaji wa Mamlaka ya Udhibiti wa Usafirishaji Nchi Kavu na Majini (Sumatra), kutokana na kushindwa kuwatetea abiria.

Akizungumza na waandishi wa habari jijini Dar es Salaam, Mwenyekiti wa Chakua, Hassani Mchanjama, amesema tangu kuanzishwa kwake, Sumatra imeshindwa kusimamia sheria na kanuni za usafirishaji, kufanya abiria waibiwe na watoa huduma hizo za usafiri.

Mchanjama amesema wamefikia hatua hiyo baada ya kubaini mamlaka hivyo imeshindwa kusimamia huduma za usafiri wa abiria, kitendo kinachowafanya watoaji wa huduma kuamua kutoza nauli wanazotaka kinyume na bei elekezi ya serikali.

Amesema ushahidi wa abiria kupandishiwa nauli holela upo na kila mara wanapopata malalamiko kutoka kwa abiria, wamekuwa wakiiandikia Sumatra barua kuijulisha wizi unaofanyika.