MAALIM SEIFF ALIA NA UTALII ZANZIBAR

Makamu wa kwanza wa Rais wa Zanzibar, Maalim Seif Sharif Hamad, ameonya hujuma zinazofanywa dhidi ya watalii wanaofika visiwani humo kuwa vinaweza kuathiri uchumi wa nchi.

Amesema Zanzibar inategemea utalii kuendeleza uchumi wake na kukuza pato la taifa, hivyo sekta hiyo ikiguswa kwa matukio ya hujuma, itaathiri uchumi, ustawi wa jamii na sifa za ukarimu wa Wazanzibar.

Maalim Seif amesema wakati wa mahojiano na waandishi wa habari, huku akisema kuwa kukabiliana na hujuma hizo, Serikali ya Zanzibar inakusudia kuweka kamera za CCTV kwenye maeneo muhimu ya utalii, hasa Mji Mkongwe ili kuwabaini wahusika wa hujuma hizo.

Kuhusu karafuu kwa maendeleo ya uchumi wa Zanzibar, Maalim Seif amesema serikali imedhibiti magendo ya zao hilo baada ya kuongeza bei na kuwashinda wanunuzi wengine Afrika Mashariki.

Amesema katika kuhakikisha ubora wa karafuu za Zanzibar unalindwa na kudhibiti wauzaji wengine, serikali kupitia Wizara ya Biashara, Viwanda na Masoko, itaweka nembo maalumu kuzitofautisha na karafuu za maeneo mengine.

Makamu huyo wa rais ambaye pia ni Katibu Mkuu wa Chama cha Wananchi (CUF), amesema kuhusu serikali ya umoja wa kitaifa kuwa itaendelea kuwepo hata baada ya uchaguzi mkuu wa mwaka 2015 kwa vile suala hilo ni la kikatiba na lenye misingi maalumu.