MIKOA NCHINI BADO INAKABILIWA NA CHANGAMOTO

Mikoa nchini bado inakabiliwa na changamoto ya usimamizi kwenye mamlaka za serikali za mitaa ambazo ndizo msingi wa kutoa huduma kwa wananchi.

Kauli hiyo imetolewa na Makamu wa Pili wa Rais wa Zanzibar, Balozi Seif Ali Iddi, wakati akifungua mafunzo ya siku tatu kuhusu mawasiliano na uhusiano kwa wakuu wa mikoa na makatibu tawala iliyoandaliwa na Taasisi ya Uongozi (Uongozi Institute) jijini Dar es Salaam.

Balozi Iddi, amesema wananchi bado wanalalamika kuhusu huduma zisizoridhisha sekta ya umma na kuwapo kwa rushwa, ucheleweshaji wa uamuzi, ubabaishaji, kukiuka maadili na kutojiamini kwa baadhi ya watumishi wa umma, hivyo kusababisha ucheleweshaji wa maendeleo.

Amesema hayo yanatokana na kutoheshimiana na kushirikiana baina ya viongozi na watumishi hata kusababisha misuguano ya kiutendaji kati yao na kutia dosari katika ofisi zao.

Ofisa Mtendaji Mkuu wa Taasisi ya Uongozi, Profesa Joseph Semboja, amesema mafunzo hayo ya kuimarisha mawasiliano na uhusiano, yatafanyika pia kwa viongozi hao visiwani Zanzibar na kufuatiwa kwa wakuu wa wilaya na makatibu tawala wao endapo bajeti ya serikali itaruhusu.

Kwa upande wake, Waziri katika Ofisi ya Waziri Mkuu, Tamisemi, Hawa Ghasia, amesema mafunzo hayo ni kwa ajili ya mikoa yote nchini, lakini ni mikoa 20 pekee hadi sasa ndiyo iliyothibitisha kuwapo, huku mingine ikitoa udhuru kujumuishwa katika mafunzo yatakayofanyika Zanzibar.