ZOEZI LA USAJILI VITAMBULISHO VYA MTANZANIA MKAAZI LAHAMIA PWANI

Mkuu wa Mkoa wa Pwani, Mwantumu Mahiza, amewataka wakazi wa Mkoa wa huo kujitokeza kwa wingi kwenye usajili na utambuzi wa watu kwa ajili ya vitambulisho vya taifa.

Zoezi hilo ambalo linatarajiwa kuanza leo katika maeneo ya mkoa huo, linatarajiwa kufanywa na Mamlaka ya Vitambulisho vya Taifa (NIDA), ambapo viongozi kuanzia ngazi ya wilaya wametakiwa kutoa ushirikiano, ili kufanikisha zoezi hilo.

Mahiza amesema atahakikisha analisimamia vizuri zoezi hilo, ili liweze kufanikiwa, hivyo kuwaomba wakuu wa wilaya na wakurugenzi kuhakikisha zoezi hilo linafanikiwa kama serikali ilivyoagiza.

Mkurugenzi wa Mamlaka ya Vitambulisho vya Taifa, Dickson Maimu, amesema zoezi hilo linaingia Mkoa wa Pwani baada ya usajili Zanzibar na Mkoa wa Dar es Salaam.

Maimu amesema mbali ya usaili, muda mwingi utatumiwa na watendaji kuhakiki taarifa za waombaji wa vitambulisho vya taifa, ili kuwa na taarifa sahihi za watu.

Aidha, Mkurugenzi huyo ameishukuru serikali kwa kuwapatia fedha za kuendesha zoezi hilo, na kwamba watakapomaliza Mkoa wa Pwani watahamia katika mikoa ya Lindi, Mtwara, Morogoro, Tanga na Kilimanjaro.