BAMITA LAITAKA BUNGE MAALUMU LA KATIBA KUJITATHMINI KWANZA!

Baraza la Maadili la Kiislamu Tanzania (Bamakita) limelitaka Bunge Maalumu la Katiba lijitathmini kama lina ulazima wa kuendelea wakati hakuna uhakika wa kupatikana kwa theluthi mbili ya wajumbe kutoka Tanzania Bara na Zanzibar kupitisha rasimu ya katiba mpya katika Bunge hilo.

Mwenyekiti wa Bamakita, Sheikh Athuman Mkambaku, amesema wajumbe wa bunge maalumu la katiba hawanabudi kuweka mbele maslahi ya taifa kuliko maslahi ya vyama au kikundi cha watu Fulani.

Shiekh Mkambaku amesema kitendo cha wajumbe wanaounda Umoja wa Katiba ya Wananchi (Ukawa) kuendelea kususia vikao vya Bunge hilo si kitendo cha busara kwani msimamo huo unatia shaka juu ya matarajio mema ya Watanzania ya kupata katiba mpya.

Pia amewaomba  watanzania kuuchukua ushauri wa Rais Jakaya Kikwete na kwamba, alichokisema katika hotuba yake ni ushauri, mwongozo na maoni yake kama kiongozi mkuu wa nchi, ambaye ana uwezo huo na kwamba, siyo lazima kwa wajumbe kufuata maoni yake.