MAUWAJI YAENDELEA GHAZA

GHAZA

Mtoto mchanga wa Kipalestina na watu wazima wanne wameuawa shahidi katika mashambulizi ya ndege za kivita za Israel huko kaskazini na katikati mwa Ukanda wa Ghaza.

Mashambulizi hayo ya Wazayuni ni ukiukaji wa makubaliano ya muda ya usitishaji vita yaliyosainiwa siku sita zilizopita kati ya utawala huo na ujumbe wa Palestina kwenye mazungumzo huko Cairo Misri.

Wapalestina wengine zaidi ya 12 wamejeruhiwa katika mashambulio hayo ya ndege za kivita za Tel Aviv katika maeneo mbalimbali ya Ukanda wa Ghaza.

Jeshi la Israel limedai kuwa Wapalestina wamerusha makombora kadhaa yaliyotua huko kusini mwa Israel.

Weledi wa mambo wanasema kuwa Israel inaendeleza mashambulizi yake huko Ghaza ili kuzidi kuwashinikiza wajumbe wa Palestina wakubali kusaini makubaliano ya kudumu ya usitishaji vita bila ya kukidhiwa matakwa yao.

Baada ya kujiri mashambulizi hayo ya Israel, harakati ya Mapambano ya Kiislamu ya Palestina Hamas pia imeanzisha mashambulizi ya makombora kuelekea Israel baada ya utawala huo kukiuka makubaliano ya kusimamisha vita huko Ghaza.