SOMALIA YAMTIA MBARONI KIONGOZI WA WAHARAMIA MOHAMMED GARFANJI

MOGADISHU

Vikosi vya usalama vya Somalia vimemtia mbaroni mmoja wa viongozi wa maharamia wa nchi hiyo, ambaye anadaiwa kuziteka nyara meli kubwa katika pwani ya Somalia.

Kiongozi huyo wa maharamia wa Somalia amekuwa akijipatia mamilioni ya dola kupitia fedha alizokuwa akilipwa kama kikomboleo.

Duru za usalama za nje na za ndani ya Somalia zimetangaza kuwa vikosi vya usalama vya Somalia vimemtia mbaroni Mohamed Garfanji pamoja na walinzi wake kadhaa huko Mogadishu mji mkuu wa nchi hiyo.

Rais Hassan  Sheikh Mahmoud  wa Somalia mwaka jana alitoa msamaha kwa maharamia wa nchi hiyo ili kukomesha mashambulizi yao karibu na pwani ya nchi hiyo ya eneo la Pembe ya Afrika, hata hivyo  alisema kuwa msamaha huo hauwahusu viongozi wa mtandao huo.

Imeelezwa kuwa Mohamed Garfanji amekamatwa katika oparesheni moja ya upokonyaji silaha na kwamba ametiwa mbaroni si kwa sababu ya uharamia.