POLISI ZAZIBAR: LAPTOP YA MANSOOR TUNAICHUNGUZA!

Jeshi la Polisi Zanzibar limesema linaendelea kuishikilia kompyuta ndogo (laptop) ya waziri wa zamani wa Serikali ya Mapinduzi Zanzibar (SMZ), Mansour Yussuf Himid kwa uchunguzi zaidi wa kipolisi.

Naibu Mkurugenzi wa Upelelezi wa Makosa ya Jinai Zanzibar, Salum Msangi amesema laptop hiyo iko mikononi mwa polisi tangu ilipokamatwa Agosti 2, mwaka huu baada ya Mansoor kukamatwa na kufunguliwa mashtaka ya kupatikana na bunduki na risasi 407 kinyume na sheria.

Msangi amesema polisi inaendelea kuifanyia upekuzi ili kujua yaliyomo ndani yake na imehifadhi vitu vya aina gani na iwapo hakutakuwa na vitu vya uvunjifu wa sheria itarejeshwa kwa mhusika.

Amesema endapo watabaini kuwapo kwa vitu vyovyote vya uvunjifu wa sheria itatumika kama kielelezo na kwamba kazi ya kuipekua inaendelea.

Hata hivyo, amesema hatua za awali za uchunguzi zimeonyesha kuna mambo alikuwa akiyatuma kwenye mitandao ya kijamii na kushiriki hatua mbalimbali za mijadala inayohusu siasa na maendeleo ya jamii.

Amesema siyo kosa mtu kushiriki na kutoa maoni katika mitandao ya kijamii lakini kuna mambo zaidi ya hapo yanahitaji kuchunguzwa.