SERIKALI YAANZA KUCHUKUA HATUA VIWANJA VYA NDEGE, MIPAKANI KUKABILIANA NA EBOLA!

Serikali imeanza kutoa fomu maalum za kuhoji wasafiri zinazotumika katika viwanja vya ndege vya kimataifa vya Mwalimu Julius Nyerere na cha Kilimanjaro ikiwa ni katika tahadhari ya kukabiliana na Ugonjwa hatari wa Ebola.

Mbali na hilo serikali imeunda kikosi kazi kinachohusisha wajumbe mbalimbali wakiwemo wadau wa maendeleo, Shirika la Afya Duniani (WHO), UNICEF, USAID na watendaji wengine kutoka taasisi za WAUJ katika mikoa ya Dar es Salaam na Pwani.

Akizungumza na waandishi wa habari jijini Dar es Salaam, Waziri wa Afya na Ustawi wa Jamii, Dk. Seif Rashid amesema kuwa fomu hizo maalum zinatumika katika viwanja hivyo na maeneo yote maalum ikiwemo mipakani.

Amesema pia wameanza kuwatambua abiria wanaoingia nchini na kuainisha nchi walizotoka kabla ya ndege kutua.

Dk. Rashid amesema kuwa serikali pia imeagiza ‘Thermoscanners’ zitakazowekwa katika viwanja hivyo ili kurahisisha utambuzi wa wasafiri watakaorudi na dalili za mwanzo ambayo ni homa.