WATOTO WALIOHIFADHIWA NCHINI AUSTRALIA KUACHIWA HURU

CANBERRA

Serikali  ya  Australia  imesema  kuwa   baadhi  ya  watoto katika  vituo  vinavyowahifadhi  wahamiaji  nchini  Australia wataachwa  huru. 

Kiasi  ya  watoto  150  na  familia  zao ambao  wamewasili  nchini  humo  kabla  ya  sheria  kali za uhamiaji  kuanza  kutumika  Julai  2013, wataruhusiwa kuishi  katika  jamii  wakati  maombi  yao  ya  hifadhi yakishughulikiwa.

Hata hivyo,  mamia  ya  watoto  wengine  walioko  nchini humo  na  wengine  nje  ya nchi  hiyo  katika  vituo  vya kuwahifadhi wataendelea  kubaki  katika  maeneo  hayo.

Waziri  wa  uhamiaji  wa  Australia,  Scott Morrison, amesema  sera  ngumu  za  uhamiaji  nchini  humo  ni muhimu  ili  kuwazuwia  watu  kufanya  safari  hatari za maboti kwenda  nchini  humo.

Makundi  ya  kutetea  haki  za  binadamu  yanakosoa hatua ya  kuwaweka  watoto  katika  vituo  hivyo  wakisema inaathiri  afya  yao  kiakili  na  kimwili.