WALIMU WATOVU WA NIDHAMU KUKIONA!

DODOMA

Halmashauri ya Wilaya ya Bahi mkoani Dodoma imesema haitawavumilia walimu walevi, walimu wa kike wanaovaa mavazi mafupi na yanayoonesha maungo ya miili yao na walimu wa kiume wanaovaa suruali za kubana.

Kauli hiyo imetolewa na Ofisa Elimu wa Wilaya ya Bahi, Mary Mathew wakati akizungumza na walimu wapya wa shule za msingi kwenye semina elekezi inayohusu utendaji wa kazi zao.

Amesema ualimu ni kazi inayohitaji nidhamu ya hali ya juu kutokana na walimu kuwa walezi wa watoto wanaokuwa wanawafundisha, hiyo ni vyema wakavaa mavazi ya heshimahasa kutokana na wao kuwa kioo cha jamii.

Amesema ni marufuku kwa walimu kuvaa nguo fupi na zile zinazoonesha maungo ya miili yao.

Pia amewataka walimu hao kuzingatia miiko ya kazi kwa mujibu wa waraka na sheria za serikali, ili kuleta ufanisi katika kuboresha elimu.

Naye, Ofisa Utumishi wa Wilaya ya Bahi Fredrick Kayombo amewashauri walimu hao kutumia fursa zao katika kuanzisha miradi itakayowafanya wakopesheke kwenye taasisi za kifedha.